Vi tilrår at du alltid nyttar siste versjon av nettlesaren din.
logo Helse Møre og Romsdal

Spesialisering i generell indremedisin ved Kristiansund sjukehus

Vi har ei felles indremedisinsk avdeling som dekker behandlingstilbodet til indremedisinske pasientar på Nordmøre, om lag 50 000 innbyggjarar. Ved avdelinga er det 9 LIS1, 11 LIS 2/3 og 13 overlegar. Vi tar imot all indremedisin på vakt og har polikliniske behandlingstilbod innan generell indremedisin, fordøyelsessjukdommar, hjartesjukdommar, lungemedisin, nyremedisin, diabetes, hematologi/onkologi og geriatri. Alle deltek i ordinær felles generell indremedisinsk vaktordning. Tilstedevakt for LIS1 og LIS 2/3, heimebasert vakt på natt for overlegar.

Akuttmottak med 5 mottaksrom. Akutt 12 er observasjonspost tilknytta akuttmottaket med 3 senger som opna i 2022 med opningstid frå kl. 9 til 21. Det er ordinær sengepost med 30 senger og felles intensivavdeling med 4 medisinske senger.


Hos oss får du utdanning som gjer det mogleg å få oppfylt alle læringsmåla i del 2 felles indremedisin, med noko hospitering ved andre avdelingar på sjukehuset. Vi reknar med at du treng om lag 3,5 år på å få oppfylt alle læringsmåla som hører til del 2. Vanlegvis startar du med teneste som er tilpassa del 2 av spesialiseringa dersom du har lite erfaring frå tidlegare. Etter kvart som du får meir erfaring får du meir krevande oppgåver slik at du også kan få oppfylt læringsmål for del 3 indremedisin. Vi reknar med at du treng om lag 2 år på å få oppfylt alle læringsmåla i del 3. Du får oppfylt også det meste av desse læringsmåla ved vår avdeling, men du vil trenge 1 år teneste ved sjukehuset i Ålesund for å få oppfylt alle læringsmåla i spesialiteten.

Når du startar hos oss får opplæring i IT-verktøy for prosedyrer og nødvendig opplæring i bruk av relevante dataprogram du treng. Du får og tildelt rettleiar. Du får og opplæring i vaktarbeid før du blir sett i sjølvstendig vakt.

Den teoretiske undervisninga skjer i samband med 11.15-møter og utgjer 90 minutt i veka. I tillegg har dei ulike fagområda eigen undervisning med andre sjukehus i føretaket eller webbasert regionalt eller nasjonalt. Teoretisk undervisning i avdeling 90 min/uke i 38 veker. 

Som LIS får du fri til å delta på nasjonalt anbefalte kurs for spesialiteten.

Vi har trening av MET-team kvar månad og har og regelmessig trening i AHLR.

Avdelinga vår er ikkje stor og du vil jobbe tett ilag med alle spesialistane. Det er dermed god tilgang på råd og hjelp etter behov, og tilgangen på både formell og uformell supervisjon og rettleiing er god.

Du vil få supervisjon av ansvarleg overlege ved sengepost, spesialist på poliklinikken og av bakvakt.

Rettleiing og fagleg utvikl​ing

Du får tildelt rettleiar når du startar hos oss og både du og rettleiar har eit felles ansvar for at rettleiing blir gjennomført. Det er lagt opp til rettleiing kvar månad. I tillegg kan det av og til bli arrangert grupperettleiing.

Det er sett av tid til fagleg fordjuping tilsvarande 4 timer per veke i arbeidsplanen.

​

Det er to legar i PhD-løp i avdelinga og ein tredje på gang. Vi leiger lokale i Campus Kristiansund for PhD-kandidatar. Vi deltek også i regionale forskingsprosjekt. Det er eiga forskingsavdeling i Ålesund som vi og nyttar etter behov.

Utdanningsutvalet utgjerast av ein overlege og ein LIS-lege. Det er overlege som er leiar av utdanningsutvalet. Utvalet planlegg gjennomføring av internundervisning, ser til at nye LIS får tildelt rettleiar og arbeider for god kvalitet i utdanninga.

Det er tillitsvalgte på både avdelings-, sjukehus- og foretaksnivå. Samarbeidet mellom dei tillitsvalte er godt og dei blir inkludert i alt som er relevant for LIS-gruppa.

For spørsmål om spesialistutdanninga, ta kontakt med:
Åge Austheim, kardiolog/utdanningsansvarlig overlege.

​


Her finn du ei oversikt over andre spesialistutdanningar i Helse Møre og Romsdal.






Sist oppdatert 02.05.2023